රුපියල් මිලියන 77ක රාජ්‍ය මුදල් වංචාවක් සම්බන්ධයෙන් අත්අඩංගුවට ගත් සබරගමු පළාත් සභාවේ සහකාර අධ්‍යක්‍ෂකවරියක් සහ සබරගමු පළාත් සභාවේ අමාත්‍යාංශයක හිටපු ලේකම්වරයකු ලබන 08 වැනි දා තෙක් රක්ෂිත බන්ධනාගාරගත කිරීමට ඇඹිලිපිටිය මහේස්ත්‍රාත් තිළිණ මහේෂ් පීරිස් නියෝග කර ඇත.
සබරගමු පළාතේ මාර්ග සහ ක්‍රිඩාංගන ඇතුළු ව්‍යාපෘති 77කට අදාළව අසත්‍ය මිනුම් පත්‍ර සකසා, ඔවුන් මෙම රුපියල් මිලියන 77ක වංචාව සිදු කර ඇති බවට අපරාධ පරීක්ෂණ දෙපාර්තමේන්තුව මගින් ඔවුන් ඉකුත් දා අත්අඩංගුවට ගෙන තිබුණි.
අපරාධ පරීක්ෂණ දෙපාර්තමේන්තුව මඟ හැර සිටි සැකකාර සහකාර අධ්‍යක්‍ෂකවරිය අප්‍රේල් 07 වැනි දා අත්අඩංගුවට ගෙන තිබුණු අතර, හිටපු ලේකම්වරයා ඇඹිලිපිටිය මහේස්ත්‍රාත් අධිකරණයට නීතිඥයෙකු මඟින් භාර වී තිබුණි.
තවද, මෙම වංචාව සම්බන්ධයෙන්ම ඇඹිලිපිටිය ප්‍රාදේශිය සභාවේ හිටපු කාර්මික නිලධාරියකු ලිපිකරුවකු සහ ලේකම්වරයකු ද මීට පෙර අත්අඩංගුවට ගෙන රක්ෂිත බන්ධනාගාරගත කර ඇත.
සබරගමු පළාතේ ව්‍යාපෘති 77 කට අදාළව මුදල් වෙන්කරගෙන ඇතත්, ඒ සඳහා මාර්ග හෝ ක්‍රිඩාංගන ඉදිකර නොතිබීම සම්බන්ධයෙන් සිදුකළ විගණන පරීක්ෂණයකින් මෙම වංචාව හෙළි වී තිබුණු අතර, 2016 සහ 2017 වර්ෂවල දී මෙම ව්‍යාපෘති 77ක නිමකර ඇති බවට අසත්‍ය ලේඛන ඉදිරිපත් කර ඇති බව ද සබරගමු පළාත් සභාව සිදුකරන ලද විමර්ශනවල දී අනාවරණය වී තිබේ.
(ජනක බලල්ල)
