සිරි දළදා වන්දනාව සාර්ථකව නිමාකළ බව දැනුම් දෙමින්, මල්වතු මහා විහාරය, අස්ගිරි මහා විහාරය සහ ශ්‍රී දළදා මාළිගාව ඒකාබද්ධ නිවේදනයක් නිකුත් කරයි.
ශ්‍රී ලංකා ප්‍රජාතාන්ත්‍රික සමාජවාදී ජනරජයේ ජනාධිපතිවරයා විසින් සිදුකරන ලද ඉල්ලීම හා ආරාධනාව අනුව, වසර 16 පසුව සිරි දළදා වන්දනාව සිදු කළ බවද, අප්‍රේල් මස 18 දින සිට 27 දින දක්වා පුරා දින දහයක්, ජීවමාන බුදුරජාණන් වහන්සේ හා සමාන වූ දන්ත ධාතූන් වහන්සේ දැක වන්දනාමාන කර ගැනීමේ දුර්ලභ අවස්ථාව මහජනතාවට ලබා දීමට කටයුතු කළ බවද එම නිවේදනයේ සඳහන් වෙයි.
එම නිවේදනයේ වැඩිදුරටත් දැක්වෙන්නේ ජනාධිපතිතුමා ඇතුළු රජයට, මධ්‍යම පළාත් ආණ්ඩුකාරතුමන් ඇතුළු කාර්ය මණ්ඩලයට, දිසාපති කාර්යාලය නගර සභාවේ සියළු කාර්ය මණ්ඩලයට, පොලිසිය හා ත්‍රිවිධ හමුදාවට, සිවිල් ආරක්ෂක බලකායට, සෞඛ්‍ය, සනීපාරක්ෂක හා වෙනත් යටිතල පහසුකම් සපයා දුන් රාජ්‍ය ආයතනවලට සහ වෙනත් අයුරින් සහයෝගය දුන් ස්වේච්ඡා සංවිධාන හා ප්‍රදේශවාසීන් හටද පුන්‍යානුමෝදනා හා ස්තුතිය පළ කර සිටින බව ය.
මහා විහාර වංශික ස්‍යාමෝපාලි මහා නිකායේ මල්වතු මහා විහාර පාර්ශවයේ මහානායක තිබ්බටුවාවේ ශ්‍රී සිද්ධාර්ථ සුමංගලාභිධාන ස්ථවිරයන් වහන්සේගේ, මහා විහාර වංශික ස්‍යාමෝපාලි මහා නිකායේ අස්ගිරි මහා විහාර පාර්ශවයේ මහානායක වරකාගොඩ ධම්මසිද්ධි ශ්‍රී පඤ්ඤානන්ද ඤාණරතනාභිධාන ස්ථවිරයන් වහන්සේගේ සහ ශ්‍රී දළදා මාළිගාගේ දියවඩන නිලමේ ප්‍රදීප් නිලංග දෑලගේ අත්සනින් මෙම නිවේදනය නිකුත් කර තිබේ.
(ජනක බලල්ල)
මේ සම්බන්ධයෙන් නිකුත් කළ නිවේදනය පහතින්.
