පළාත් පාලන ඡන්ද විමසීමට අදාළ තැපැල් ඡන්දය සලකුණු කිරීම හෙට (24) සිට ආරම්භ වන බව මැතිවරණ කොමිෂන් සභාව නිවේදනය කරයි.
මෙවර ඡන්ද විමසීම සඳහා තැපැල් ඡන්දදායකයන් 648,495 සුදුසුකම් ලබා ඇති අතර පොලීසිය, ත්‍රිවිධ හමුදාව, පාසල්, සංස්ථා, ව්‍යවස්ථාපිත මණ්ඩල ඇතුළු සියලුම රාජ්‍ය ආයතන සඳහා තැපැල් ඡන්දය සලකුණු කිරීම මේ මස 24, 25, 28 සහ 29 යන දින හතර තුළ සිදුකිරීමට නියමිත ය.
මහනුවර සිරි දළදා වන්දනාව වෙනුවෙන් විශේෂ රාජකාරිවල යෙදී සිටින පොලීසියේ සියලුම නිලධාරීන් සඳහා විශේෂ තැපැල් ඡන්ද මධ්‍යස්ථානයක් මහනුවර උසස් බාලිකා විද්‍යාලයේ පිහිටුවා ඇති බවත් මීට අමතරව විශේෂ රාජකාරිවල නිරත වන ත්‍රිවිධ හමුදා නිලධාරීන් සඳහා ඒ ඒ හමුදා කඳවුරුවලදී නියම කරනු ලබන සහතික කිරීමේ නිලධාරියකු ඉදිරියේ ඉදිරි දින 4 තුළ තැපැල් ඡන්දය සලකුණු කිරීමට හැකි බවත් මැතිවරණ කොමිසම පවසයි.
තැපැල් ඡන්දය භාවිත කිරීමේදී ජාතික හැඳුනුම්පත, වලංගු රියදුරු බලපත්‍රය, වලංගු විදේශ ගමන් බලපත්‍රය, මැතිවරණ කොමිෂන් සභාව විසින් නිකුත් කරන ලද තාවකාලික හැඳුනුම්පත හා ජාතික හැඳුනුම්පත වෙනුවට පුද්ගලයන් ලියාපදිංචි කිරීමේ දෙපාර්තමේන්තුව විසින් නිකුත් කරනු ලබන තොරතුරු තහවුරු කිරීමේ ලිපිය භාවිත කළ හැකි බව ද මැතිවරණ කොමිෂන් සභාව වැඩිදුරටත් නිවේදනය කරයි.
(ජනක බලල්ල)
