ජී.ජී. අමරසිරි හෙවත් ජුලම්පිටියේ අමරේ නමැත්තාට පනවා තිබූ මරණීය දණ්ඩනය අභියාචනාධිකරණය තහවුරු කර තිබේ.
2012 වසරේ කටුවන ප්‍රදේශයේ පැවැති ජනතා විමුක්ති පෙරමුණේ රැස්වීමකට කඩාවැදී පුද්ගලයන් දෙදෙනකු වෙඩිතබා මරාදමා තවත් අයකුට මරණීය තුවාල සිදු කිරීමේ චෝදනාවට තංගල්ල මහාධිකරණය මගින් මරණ දණ්ඩණය නියම කර තිබුණු අතර, වරදකරු කළ තැනැත්තා විසින් එම තීන්දුව අභියෝගයට ලක්කරමින් අභියාචනා පෙත්සමක් ඉදිරිපත් කරන ලදී.
ජුලම්පිටියේ අමරේ නමැත්තා රාජපක්ෂ පවුල සමග සෘජු සබඳතා පැවැත්වූ බවට වත්මන් ජනාධිපති අනුර කුමාර දිසානායක රාජපක්ෂවරු බලයේ සිටි සමයේ මාධ්‍ය මගින් දිගින් දිගටම සඳහන් කර තිබුණි.
කෙසේ වෙතත් අදාළ අභියාචනය ප්‍රතික්ෂේප කළ අභියාචනාධිකරණ විනිසුරු මඬුල්ල සිය තීන්දුවෙන් ප්‍රකාශ කර තිබුණේ මහාධිකරණ විනිසුරුවරයා විසින් නිකුත් කරන ලද මරණීය දණ්ඩනය සම්බන්ධයෙන් මැදිහත්වීම් සිදු කිරීමට තම අධිකරණය අපේක්ෂා නොකරන බවයි. ඒ අනුව විත්තිකරුට පනවා තිබෙන මරණීය දණ්ඩනය තහවුරු කරන බව අභියාචනාධිකරණය වැඩිදුරටත් ප්‍රකාශ කර තිබිණි.
විනිසුරු පී. කුමාරන් රත්නම්ගේ එකඟත්වය ඇතිව අභියාචනාධිකරණ විනිසුරු සම්පත් අබේකෝන් විසින් අද (නොවැම්බර් 20) දිනයේ දී තීන්දුව මෙලෙස ප්‍රකාශයට පත්කරන ලදී.
(ජනක බලල්ල)
