මැතිවරණ වාර්තා පොත් අළුත් කළ මාලිමාව තැබූ වාර්තා මෙන්න

පසුගිය 14 වැනි දා පැවැති 2024 මහ මැතිවරණයෙන් ජාතික ජන බලවේගය විසින් ඓතිහාසික ජයග්‍රහණයක් ලද අතර, එහි දී ඔවුන් හට මෙරට මැතිවරණ ඉතිහාසයේ පැවැති බොහෝ වාර්තා රැසක් බිඳ දැමීමට හා නව වාර්තා ඉතිහාසයට එක්කිරීමට සමත් විය.

එම වාර්තා කිහිපයක් මෙසේ ය.
මෙරට ඉතිහාසයේ මහ මැතිවරණයකදි දේශපාලන පක්ෂයක් ලබාගත් වැඩිම ඡන්ද සංඛ්‍යාව වන 6,863,186ක් ලබාගැනීමට ජාතික ජන බලවේගයට සමත් විය. මීට පෙර එම වාර්තාව ඡන්ද 6,853,690ක් ලබා ගනිමින් ශ්‍රී ලංකා පොදුජන පෙරමුණ 2020 දී තබා තිබිණි.

මහ මැතිවරණයකදී ඉතිහාසයේ පක්ෂයක් ලබාගත් වැඩිම ඡන්ද ප්‍රතිශතයද හිමිවන්නේ මෙවර ජාතික ජන බලවේගය වෙතය. එය 61.56%කි. මීට පෙර 2010දී එක්සත් ජනතා නිදහස් සන්ධානය විසින් 60.33%ක් වු වැඩිම ඡන්ද ප්‍රතිශතය වාර්තා කර තිබිණි.

මහ මැතිවරණයක වැඩිම දිස්ත්‍රික්ක ගණනක් ජයග්‍රහණය කිරීමෙන් තැබූ පැරැණි වාර්තාව බිඳ දැමීමට ද ජාතික ජන බලවේගයට හැකි විය. ඒ මඩකලපුව දිස්ත්‍රික්කය හැර සෙසු මැතිවරණ දිස්ත්‍රික්ක 21ම ජයග්‍රහණය කරමිනි. මීට පෙර 2010දී එක්සත් ජනතා නිදහස් සන්ධානය දිස්ත්‍රික්ක 19ක් දිනාගනිමින් තැබු වාර්තාව එලෙස බිඳ වැටී ඇත.

මහ මැතිවරණයක දී එක් පක්ෂයක් ජයගත් වැඩිම ඡන්ද කොට්ඨාස ගණන ලෙස ඡන්ද කොට්ඨාස 152ක් ජය ගනිමින් නව වාර්ථාවක් තැබීය. මීට පෙර 2010 දී එක්සත් ජනතා නිදහස් සන්ධානය කොට්ඨාස 136ක් හිමි කරගෙන තිබුණි.

ශ්‍රී ලංකා පොදුජන පෙරමුණ 2020 මහ මැතිවරණයේ දී ආසන 128ක් දිනා ගනිමින් පිහිටුවා තිබු වාර්තාව ද බිඳ දමමින් ජාතික ජන බලවේගය දිස්ත්‍රික් මට්ටමින් දිනාගත් වැඩිම ආසන ගණන වන ආසන 141ක් දිනා ගැනීමට මෙවර තවත් වාර්තාවක් තැබීය.

ලබා ගත් ඡන්ද ප්‍රතිශතය මත හිමිවන ජාතික ලැයිස්තු ආසන මෙවර ජාතික ජන බලවේගයට 18කි. මහ මැතිවරණයකදි වැඩිම ජාතික ලැයිස්තු ආසන ගණනක් හිමි කරගත් පක්ෂය බවටද ජාතික ජන බලවේගය තවත් වාර්තාවක් තැබීය. එම වාර්තාව මීට පෙර 2020 මහ මැතිවරේ දී ශ්‍රී ලංකා පොදුජන පෙරමුණ විසින් ලබාගනු ලැබූ ජාතික ලැයිස්තු ආසන 17 කින් ඔහුන් සතු කරගන්නට සමත් ව සිටියේ ය.

මහමැතිවරණයක දී හිමිකරගත් වැඩිම ආසන ගණන ලබාගැනීමට ජාතික ජන බලවේගයට මෙම මැතිවරණයෙන් සමත් විය  ඒ ආසන 159ක් දිනා ගනිමිනි.  මීට පෙර වර්ෂ 2020 දී ශ්‍රී ලංකා පොදුජන පෙරමුණට හිමිව තිබුණේ ආසන 145කි.

සමානුපාතික ක්‍රමය යටතේ පාර්ලිමේන්තුවේ ආසන 225න් 2/3ක් තනි පක්ෂයකට හිමි කර ගැනීමෙන් නව වාර්තාවක් තැබීම ට ජාතික ජන බලවේගය ට හැකිවිය. එමෙන්ම තනි පක්ෂයක් ලෙස මුළු රටේම මැතිවරණ දිස්ත්‍රික්ක 22න්ම මන්ත්‍රීවරු ධුර දිනා ගත් ආණ්ඩුව ලෙසද ජාතික ජන බලවේගය ඉතිහාස ගත වේ.

වර්ෂ 2020 දී පැවැති මහ මැතිවරණයේ දී ශ්‍රී ලංකා පොදුජන පෙරමුණට විශිෂ්ට ජයක් හිමිවුණත්, උතුර නැගෙනහිර සහ වතු කම්කරු ජනතාව අතර ජයග්‍රහණය හිමිවූයේ නැත.

(ජනක බලල්ල)